ஓ.ம் திரைப்படத்தில் சண்டை காட்சிகளில் சாய் பல்லவிக்கு டூப்பா? வெளிவந்த புகைப்படம் இதோ
O.M movie sai pallavi stunt double: ஓ.ம் திரைப்படத்தில் ஆக்ஷன் காட்சிகளில் நடிகை சாய் பல்லவிக்கு டூப் போட்ட பெண் தனது இன்ஸ்டாகிராம் பக்கத்தில் வெளியிட்டுள்ள புகைப்படங்கள் ரசிகர்களிடையே வைரலாகியுள்ளன. அவர் யார் என்று இந்த பதிவில் பார்க்கலாம் வாங்க.
ஓ.ம்: Operation Mole
இயக்குநர் ராஜ்குமார் பெரியசாமி இயக்கத்தில் கடந்த 2023-ஆம் ஆண்டு வெளியான அமரன் திரைப்படத்தில் இந்து ரெபேக்கா வர்கீஸ் எனும் கதாபாத்திரத்தை ஏற்று நடித்திருந்தார் நடிகை சாய் பல்லவி. இதன்பின், மீண்டும் ராஜ்குமார் இயக்கத்தில் இவர் நடித்து கடந்த 20-ஆம் தேதி வெளியான திரைப்படம்தான் ஓ.ம்.

தனுஷ், மம்மூட்டி ஆகியோர் இப்படத்தில் நடிக்க, நடிகை சாய் பல்லவி போலீஸ் அதிகாரியாக நடித்து அசத்தியிருந்தார். அதுவும் ஆக்ஷன் காட்சிகளில் இவர் நடித்த விதம், சண்டை போட்டது என்பது அனைவரிடமும் வரவேற்பை பெற்றது. இது தனுஷ், மம்மூட்டி படம் என்பதை தாண்டி, இது சாய் பல்லவி படம் என்றே பலரும் விமர்சனம் தெரிவித்து வருகிறார்கள்.
சாய் பல்லவிக்கு டூப்-ஆ?
இந்த நிலையில், ஓ.ம் திரைப்படத்தில் நடிகை சாய் பல்லவிக்கு பதிலாக சண்டை காட்சிகளில் ஒத்திகை பார்த்த பெண் ஒருவர் தனது இன்ஸ்டாகிராம் பக்கத்தில் படப்பிடிப்பு புகைப்படங்களுடன் சேர்த்து தனது அனுபவத்தையும் பகிர்ந்துள்ளார். இந்த புகைப்படங்களை மட்டுமே பார்த்த ரசிகர்கள் சிலர், சாய் பல்லவி இப்படத்தில் டூப் போட்டு நடித்துள்ளாரா என கேட்க ஆரம்பித்துவிட்டனர். ஆனால், உண்மையில் நடிகை சாய் பல்லவிதான் அனைத்து சண்டை காட்சிகளிலும் பயிற்சி எடுத்து நடித்திருக்கிறார்; டூப் போடவில்லை.

இதுகுறித்து, ஸ்டண்ட் உதவியாளராகவும், கேமரா ஒத்திகைக்கு உதவிய அந்த பெண் தனது இன்ஸ்டா பக்கத்தில் கூறியிருப்பது, "மீண்டும் ஒரு படம், மீண்டும் ஒரு அற்புதமான அனுபவம். நடிகை சாய் பல்லவி அவர்கள், சில மணிநேர பயிற்சி மட்டுமே பெற்றிருந்தாலும், சண்டை காட்சிகள் அனைத்தையும் அவரே மிக சிறப்பாக செய்து முடித்தார். நான் இதில் ஸ்டண்ட் உதவியாளராகவும், சண்டை காட்சிகளை சரியாக அமைப்பதற்கும், கேமரா ஒத்திகைகளுக்கும் உதவும் ஒரு நபராகவும் பணியாற்றினேன்" என பதிவு செய்துள்ளார்.